2026-cı ilin ilk üç ayında Azərbaycanda istehlak qiymətləri artmağa davam edib, ən ciddi bahalaşma isə yenə qida məhsullarında qeydə alınıb

2026-cı ilin yanvar-mart aylarında Azərbaycanda istehlak qiymətləri ötən ilin eyni dövrü ilə müqayisədə 5,7 faiz artıb. Bu barədə Dövlət Statistika Komitəsi məlumat yayıb.

Qurumun açıqlamasına görə, ilk rübdə qida məhsulları, alkoqollu içkilər və tütün məmulatlarının qiymətləri 6,8 faiz, qeyri-qida məhsulları 3,6 faiz, əhaliyə göstərilən ödənişli xidmətlər isə 5,7 faiz bahalaşıb.

Mart ayında da qiymət artımı davam edib. Belə ki, qida məhsulları, alkoqollu içkilər və tütün məmulatları əvvəlki aya nisbətən 1,0 faiz, illik müqayisədə isə 6,5 faiz artıb.

Ayrı-ayrı məhsullar üzrə isə əsas bahalaşma uzun düyü, çörək, toyuq əti, təzə balıq, süd və süd məhsulları, bitki yağları, sitrus meyvələri, tərəvəzlər və kartofda qeydə alınıb. Eyni zamanda yumurta, soğan, sarımsaq və bəzi tərəvəzlərin qiymətində ucuzlaşma müşahidə olunub.

Qeyri-qida məhsulları üzrə mart ayında qiymətlər aylıq müqayisədə 0,2 faiz, illik müqayisədə 3,7 faiz artıb. Bu kateqoriyada əsas bahalaşma sement, mebel və zərgərlik məmulatlarında qeydə alınıb. Qış geyimləri və bəzi məişət texnikalarının qiymətində isə azalma olub.

Ödənişli xidmətlər sahəsində də qiymətlər yüksəlib. Mart ayında bu xidmətlər üzrə qiymətlər aylıq müqayisədə 0,2 faiz, illik müqayisədə 5,7 faiz artıb. Əsas bahalaşma beynəlxalq hava nəqliyyatı xidmətlərində qeydə alınıb. Xarici istirahət turlarının qiymətində isə ucuzlaşma olub.

Dövlət Statistika Komitəsinin məlumatına görə, ötən ilin mart ayı ilə müqayisədə illik qiymət artımı 5,6 faiz, son bir ayda isə 0,5 faiz təşkil edib.

İqtisadçılar hesab edir ki, qiymət artımının əsas səbəbləri daxili bazarda təklifin məhdudluğu, idxaldan asılılıq və mövsümi amillərlə bağlıdır. Onların fikrincə, xüsusilə ərzaq məhsullarında bahalaşma əhalinin real gəlirlərinə daha ciddi təsir göstərir.

Ekspertlər bildirir ki, qlobal bazarlarda qiymət dəyişiklikləri və logistika xərclərinin artması da Azərbaycanda inflyasiyanı şərtləndirən əsas amillərdən biridir. Onlar yaxın aylarda da qiymət artımının tam dayanacağını real hesab etmir və bazarda nisbi sabitliyin yalnız təklifin genişlənməsi və idxal xərclərinin azalması ilə mümkün olacağını vurğulayırlar.