Martın 3-də İsrail Müdafiə Qüvvələri (IDF) Tehran və Beyrutdakı hərbi obyektlərə qarşı yeni zərbələr endirdiyini açıqlayıb. “Reuters” agentliyi Livanın paytaxtında partlayışların baş verdiyini xəbər verib.

IDF-in sözçüsü Avixay Adrai Beyrutun cənub ətraflarında olan sakinlərə təxliyə xəbərdarlığı edib. İsrail ordusunun məlumatına görə, gecə saatlarında İran ərazisindən İsrail istiqamətinə raketlər buraxılıb, Livan isə iki pilotsuz uçuş aparatı göndərib.

IDF həmçinin İranın zenit-artilleriya qrupunu zərərsizləşdirdiyini və İsrail Hərbi Hava Qüvvələrinə qarşı istifadə olunmaq istənilən sistemi sıradan çıxardığını bildirib. Bundan əlavə, İran Dövlət Televiziya və Radio Şirkətinin - “IRIB”in binasına zərbə endirildiyi açıqlanıb.

IDF-in “Telegram” kanalında yayılan məlumatda deyilir ki, İsrail Hərbi Hava Qüvvələri “İran terror rejiminin rabitə mərkəzinə” zərbə endirib. Bildirilir ki, mərkəz hərbi fəaliyyətlərin mülki obyekt adı altında təşkili və təbliğat məqsədləri üçün istifadə olunub və fəaliyyətlər İslam İnqilabı Keşikçiləri Korpusunun (SEPAH) nəzarəti altında həyata keçirilib.

İran mediası isə “IRIB”in baş qərargahına zərbə endirildiyini təsdiqləsə də, qurumun fəaliyyətini davam etdirdiyini bildirir.

ABŞ Silahlı Qüvvələrinin Mərkəzi Komandanlığı - ABŞ Silahlı Qüvvələrinin Mərkəzi Komandanlığı (CENTCOM) - səhər saatlarında yaydığı açıqlamada əməliyyat çərçivəsində SEPAH-ın komanda-nəzarət məntəqələrinin, hava hücumundan müdafiə sistemlərinin, raket və dron buraxılış meydançalarının, eləcə də hərbi aerodromların məhv edildiyini bildirib.

Qurumun məlumatına görə, fevralın 28-də ABŞ və İsrailin İrana qarşı əməliyyatı başlayarkən Oman körfəzində olan 11 İran hərbi gəmi və kateri artıq sıradan çıxarılıb. “İki gün əvvəl İran rejiminin Oman körfəzində 11 gəmisi var idi, indi isə bir dənə də yoxdur”, – deyə açıqlamada bildirilir.

CENTCOM Tehranın ABŞ aviadaşıyıcısını vurması ilə bağlı iddiaları da təkzib edib. Bildirilib ki, döyüş əməliyyatları zamanı zərər görən yeganə aviadaşıyıcı tipli gəmi İranın “Shahid Bagheri” adlı hərbi gəmisidir. Naval News nəşri daha əvvəl Çabahar limanında “Jamaran” sinifli İran korvetinin batırılması barədə məlumatı təsdiqləmişdi.

İran rəsmiləri donanmaya dəyən zərər barədə hələlik rəsmi açıqlama verməyiblər. İran Hərbi Dəniz Qüvvələrinin tərkibində onlarla sualtı qayıq, bir neçə freqat və korvet, həmçinin çoxsaylı raket katerləri və patrul gəmiləri var.

ABŞ Prezidenti Donald Tramp “NewsNation” telekanalına müsahibəsində bildirib ki, tezliklə İranda nəzarətin kimdə olduğu bəlli olacaq. O, quru əməliyyatının, böyük ehtimalla, lazım olmayacağını deyib:

“Biz onlara nəhəng zərər vururuq. Kolossal zərər yetiririk”, - deyə Tramp vurğulayıb.

Ağ Evin rəhbəri İranın dron hücumlarına cavab veriləcəyini də bildirib və əməliyyatın məqsədlərinə çatmağın “yalnız zaman məsələsi” olduğunu qeyd edib. Daha əvvəl o, İranın təxminən 10 hərbi gəmisinin “dənizin dibində olduğunu” demişdi.

İsrailin Baş naziri Binyamin Netanyahu “Fox News” telekanalına müsahibəsində İsrail və ABŞ-nin birgə hərbi əməliyyatlarının zəruri olduğunu bildirib. Onun sözlərinə görə, İran həm ABŞ-ni məhv etməyi hədəfləyir, həm də ballistik raket və nüvə silahı proqramlarını genişləndirirdi.

Netanyahu deyib ki, İran əvvəlki zərbələrdən nəticə çıxarmayıb və yeraltı bunkerlər və yeni obyektlər tikərək hərbi proqramlarını toxunulmaz etməyə çalışıb.

“Bu müharibə sonsuz olmayacaq. Bu, sürətli və qətiyyətli əməliyyat olacaq”, – deyə İsrailin baş naziri vurğulayıb.

İsrail və ABŞ fevralın 28-dən etibarən İrana qarşı zərbələr endirir. İran isə cavab olaraq region ölkələrində yerləşən İsrail və ABŞ hərbi bazalarına, eləcə də enerji obyektlərinə hücumlar həyata keçirir.