Ermənistanın baş naziri Nikol Paşinyan “Public TV”yə müsahibəsində ölkəsinin dəmir yollarına nəzarəti Rusiyadan geri almağı gündəmə gətirib. O, bunu Ermənistanın tranzit və rəqabət üstünlüklərini qorumaq, həmçinin ölkə üzərindən beynəlxalq marşrutun formalaşdırılması zərurəti ilə əsaslandırıb.

Paşinyanın sözlərinə görə, 2008-ci ildə imzalanmış 30 illik güzəşt müqaviləsinə əsasən, Ermənistan dəmir yolu sistemi “Russian Railways”in yaratdığı “South-Caucasian Railway” CJSC-yə verilib. Baş nazir bildirib ki, son vaxtlar Rusiya tərəfinə dəmir yolunun bəzi hissələrinin bərpası ilə bağlı müraciət ediblər və “müsbətə bənzər” cavab alıblar. Bununla yanaşı, o, regional kommunikasiyalar kontekstində “çox vacib praktiki məsələ”nin yarandığını vurğulayıb.

Paşinyan Azərbaycanın əsas hissəsini Naxçıvanla birləşdirməsi nəzərdə tutulan “Trump Route” marşrutu barədə danışarkən bildirib ki, xəttin Azərbaycanın Zəngilan rayonunda Ermənistanın Meğri rayonuna daxil olub ordan Naxçıvana keçməsi gözlənilir.
Baş nazirin sözlərinə görə, dəmir yolu bağlantısının davamı üçün iki “rəqabətli seçim” var:

* Türkiyə və Azərbaycanın artıq elan etdiyi Qars–Naxçıvan istiqamətində yeni xətt (Paşinyan bunu Qars–Dilucu marşrutu kimi də qeyd edib);

* Ermənistandan keçən variant: Yeraskhdan Axurikə - mövcud dəmir yolu xətti üzərindən.

Paşinyan bildirib ki, Naxçıvanla sərhəddə yerləşən Yeraskhda cəmi bir neçə kilometr rels çatışmır, Türkiyə sərhədindəki Axurikdə isə çatışmayan hissə “daha da qısadır”.

“Burada görürük ki, beynəlxalq kontekstdə bu dəmir yolu hissəsinin Rusiyanın idarəçiliyində olması Qars-Dilucu marşrutunu daha əlverişli kimi təqdim etmək üçün istifadə olunur. Bu, bizim üçün problemdir, çünki hazır dəmir yolumuz olduğu halda rəqabət üstünlüyümüzü itiririk”, - Paşinyan deyib.

O əlavə edib ki, Rusiya ilə bu məsələyə “dost, mehriban, barışıq və qardaşlıq məntiqi” ilə həll yolu tapılmalıdır. Paşinyanın sözlərinə görə, mövzunu Türkiyə prezidenti Rəcəb Tayyib Ərdoğan və Azərbaycan prezidenti İlham Əliyevlə görüşlərində də qaldırıb:

“Dedim ki, biz normallaşmaya doğru gedirik, sülhə doğru gedirik, yəni artıq sülh vəziyyətindəyik və bu dəmir yolu Ermənistandan keçir. Bəs niyə bir neçə milyard dollar xərcləyib, onsuz da mövcud olan nəyisə yenidən yaradırsınız?” - Paşinyan bildirib.

Onun sözlərinə görə, bu sual “diplomatik sükutla” cavablandırılıb. Paşinyan beynəlxalq mediada və analitiklər arasında Ermənistan dəmir yolunun “Rusiya marşrutu” kimi təqdim edildiyini xatırladaraq, hökumətin “əsas problemin Rusiya amili olduğunu” anladığını və çıxış yollarını dəyərləndirdiyini söyləyib.

“Biz Ermənistanın uzunmüddətli strateji maraqlarından danışırıq və bütün dost ölkələr maraqlı olmalıdır ki, bizim maraqlarımız təmin olunsun, əksinə dalana dirənməsin”, - o əlavə edib.

Eyni müsahibədə Paşinyan Rusiyanın Ermənistanın Aİ ilə yaxınlaşması və mümkün üzvlük istiqamətində addımları barədə narahatlıqlarına da toxunub. O bildirib ki, yanvar ayından Moskva Aİ-ni Rusiyaya qarşı “qarşıdurmaya yönələn strateji xətti” olan “aqressiv hərbi-siyasi blok”a çevrilməkdə ittiham edir.

“Rusiyaya və ya Rusiya maraqlarına zərər vurmaq bizim gündəmimizdə olmayıb, yoxdur və olmayacaq. Bu, istisnadır”, - deyə vurğulayan Paşinyanın sözlərinə görə, bu mövqeni həm Rusiya, həm də digər beynəlxalq tərəfdaşlarla da bölüşüblər.

Baş nazir əlavə edib ki, “Trump Route” nümunəsi ilə Rusiya tərəfinin narahatlıqlarına da cavab veriblər və Rusiyaya son beş ildə oxşar layihə üçün imkan təklif olunduğunu deyib. Paşinyanın sözlərinə görə, onlar sadəcə “beş sözün” kağız üzərində təsbitini istəyiblər: ərazi bütövlüyü, suverenlik, yurisdiksiya, qarşılıqlılıq və sərhədlərin toxunulmazlığı.

“Dedik: bu beş sözü kağıza yazın, mən o kağıza istənilən vaxt imza atmağa hazıram”, - Paşinyan bildirib və sözlərində şişirtmə olmadığını əlavə edib.