Parisdə mənzillənən Sərhədsiz Reportyorlar Təşkilatı (RSF) dünyanın müxtəlif ölkələrində həbsdə olan beş məşhur jurnalistlə bağlı kampaniyaya start verib. Onlardan biri də “AbzasMedia”nın bir ildən çoxdur əsassız ittihamlarla həbsdə saxlanılan baş redaktoru Sevinc Vaqifqızıdır.

“RSF” bununla bağlı saytında yayımlanan məqaləsində əsassız “xarici valyuta qaçaqmalçılığı” ittihamı ilə aparılan bu məhkəmələri qətiyyətlə pisləyib və Sevinc Vaqifqızının cəsarətinə, peşəkar fədakarlığına ehtiramını bildirib. Təşkilat Sevinc Vaqifqızı və onun həbsdə olan həmkarlarının dərhal azadlığa buraxılmasını tələb edib.

Məqalədə vurğulanıb ki, Azərbaycan rejiminin təzyiqlərinə tab gətirməkdə təcrübəli olan gənc baş redaktor ədalətsizliyə boyun əyməyən birinin dəyanətli baxışına və münasibətinə sahibdir. Həmçinin məqalədə Sevinc Vaqifqızının Sərhədsiz Reportyorlar Təşkilatının suallarına cavabları da yer alıb.

"Ruhdan düşmürük", – deyə o, həbsxanadan “RSF”ə bildirib.

Martın 11-də keçirilən məhkəmə prosesində Sevinc Vaqifqızı açıq şəkildə bildirib ki, onun həbsinə görə Azərbaycan prezidenti İlham Əliyev məsuliyyət daşıyır:

"Bizim həbsimiz jurnalistikadan uzaqlaşdırılmağımıza hesablanıb, çünki biz İlham Əliyev və onun ətrafının korrupsiya cinayətlərini ifşa etdik”.

O, ittihamların tamamilə saxta olduğunu vurğulayaraq, "Bu iş qaçaqmalçılıq, qeyri-qanuni sahibkarlıq, vergidən yayınma və ya saxta sənəd işlətməklə bağlı deyil. Bu, sadəcə həqiqətə dözümsüzlük nümunəsidir", –  deyə o, bəyan edib.

“RSF”in məqaləsində qeyd edilib ki, bu məhkəmə prosesi müstəqil medianın susdurulması istiqamətində gənişləndirilmiş təzyiqin bir hissəsidir.

35 yaşında olan Sevinc Vaqifqızı 2023-cü il noyabrın 21-də “Abzas Media”nın direktoru Ülvi Həsənli həbs olunduqdan bir gün sonra həbs olunacağını bilərək İstanbuldan Azərbaycana qayıdıb. O, artıq 500 günə yaxındır ki, həbsdədir, lakin jurnalist təslim olmur.

"Burada həyat monotondur, ancaq biz onu daha rəngarəng edirik, ad günlərimizi qeyd edirik", – deyə Sevinc “RSF”-ə bildirir.

Həbsxana divarları arasında da Sevinc Vaqifqızı azad mətbuat və həqiqət uğrunda mübarizəsini davam etdirir.

“Sevinc Vagifqızı müstəqil jurnalistikanın ləyaqətini, ümidini və repressiyaya qarşı müqavimətini təcəssüm etdirir. Onu həbsdə saxlamaqla Azərbaycan hakimiyyəti sadəcə olaraq azad mətbuatın gücü qarşısında zəifliyini nümayiş etdirir – bu, onların anlaya bilmədiyi bir qüvvədir. RSF Sevinc Vagifqızı və peşə borcunu yerinə yetirdikləri üçün həbs olunan digər 24 media nümayəndəsinin dərhal azadlığa buraxılmasını tələb edir”, – “RSF”-in Şərqi Avropa və Mərkəzi Asiya üzrə bölmə rəhbəri Janna Kavelye bildirib.

Mətin və iradəli Sevinc Vagifqızı həbsxanada müşahidələrini davam etdirir və gördüklərini sənədləşdirir, bu təcrübəni bir növ reportaj formasına çevirir.

“Əslində, bura bizim həmişə öz gözlərimizlə görmək istədiyimiz yerdir. Jurnalist kimi bu mümkün deyildi. Burada yaşamalısan ki, nələrin baş verdiyini anlayasan, məhbuslarla tanış olasan və sistemin necə işlədiyini real olaraq hiss edəsən”, – Sevinc Vaqifqızı bildirib.

Məqalədə deyilir ki, Sevinc Vaqifqızı jurnalistikanı təsadüfən seçməyib. Birinci Dağlıq Qarabağ müharibəsi (1988-1994) zamanı qaçqın düşmüş, iki bacısı ilə paytaxt Bakıda çəkin həyat şəraitində böyüyüb.

Valideynləri ovuclarında olan hər şeyi qızlarının təhsilinə xərcləyiblər. Hələ gənc yaşlarında müəllimlərindən biri Sevinci ​​jurnalist olmağa həvəsləndirib, şagirdinin“həmişə həqiqəti danışdığını və ədalət uğrunda mübarizə apardığını” qeyd edib.

“Haqsızlıq gördükdə susması mümkün deyildi. Jurnalistika onun tez bir zamanda insanlara kömək vasitəsinə çevrildi”, – Jurnalistin anası Ofelya Məhərrəmova qızının gənclik vaxtları ilə bağlı sualı cavablandırarkən deyib.

Sevinc Vagifqızı 2006-cı ildə Bakı Dövlət Universitetinin jurnalistika fakültəsinə daxil olub. 2009-cu ildən etibarən "Bizim Yol", "Azadlıq" və daha sonra "Meydan TV" kimi müstəqil media orqanlarında çalışıb.

Onun reportajları unudulan vətəndaşlara, cəbhə xəttində həlak olan əsgər ailələrinə, qurbana çevrilən insanların səsinə səs verir. Yaxınları tərəfindən “tam ürəklə” təsvir edilən jurnalist aksiyanın keçirildiyi yerə, başqalarının getməyə cəsarət etmədiyi ucqar kəndlərə gedir. 

O, hakimiyyətdən sui-istifadə hallarını, o cümlədən hakim Əliyevlər ailəsinin gizlədilmiş əmlakını, Qarabağ bölgəsinin yenidən qurulması ilə bağlı mənimsəmələri, Prezident ailəsinə və onun xanımı, eyni zamanda vitse-prezident olan Mehriban xanıma məxsus Heydər Əliyev Fondu və PAŞA Holdinq kimi qurumlar daxilində maraqların toqquşmasını araşdırıb.

Mühacirətdən “RSF”-ə danışan “Abzas Media”nın baş redaktoru vəzifəsini icra edən Leyla Mustafayeva deyib ki, “Sevinc qorxmazdır, heç vaxt təzyiqdən çəkinməyib”.

Sevinc Vaqifqızı avtoritar ölkədə peşə fəaliyyəti ilə bağlı mətbuat azadlığını da həvəslə müdafiə edir. O, 2023-cü ilin fevralında  yeni media qanununun gətirdiyi məhdudiyyətləri pisləyən açıq məktubu imzalayan 40 cəsur şəxsdən biri idi.

Sevinc Vaqifqızı jurnalistika sahəsində göstərdiyi fədakarlığa görə daim nəzarət altında olub. 2015-2019-cu illərdə onun ölkədən çıxışına qadağa qoyulub. 2020-ci ildə  aksiyanı işıqlandırarkən polis tərəfindən döyülüb. O, çoxsaylı həbslər, təhdidlər, qarayaxma kampaniyaları və işinə mane olmaq cəhdləri ilə üzləşib. 

2023-cü ilin noyabrında Bakı hava limanında həbs olunandan sonra bir neçə həftə Sevincin həbsxananın çölü ilə əlaqəsi kəsilib, jurnalist və ailə üzvlərinə məxsus bank hesabları altı ay müddətinə dondurulub. Jurnalistin sözlərinə görə, onu zorakılıqla divara sıxıblar, soyuq və həddindən artıq dolu olan kameralarda saxlayıblar və ona tibbi yardım göstərilməyib. Jurnalist və onun həbsdə olan həmkarları zorakılıq şikayətləri ilə bağlı araşdırmanın aparılmamasına etiraz olaraq iki dəfə məhkəməyə gəlməkdən imtina ediblər.

Lakin Sevinc Vaqifqızı həbsdə olsa da, həqiqət uğrunda mübarizəsini davam etdirir. O, Sərhədsiz Reportyorlar Təşkilatına verdiyi açıqlamada bildirib:

“Hava limanında həbsimdən əvvəl söz vermişdim ki, korrupsiya ilə bağlı araşdırmalar davam edəcək. Bizi bir-bir həbs etsələr də. Biz hər zaman onların gözləntilərini alt-üst edəcəyik”.

O, həmkarlarına minnətdar olduğunu vurğulayaraq əlavə edib:

“Xarici və azərbaycanlı jurnalistlər araşdırmaları davam etdirir. Bu, o deməkdir ki, həbsimiz heç nəyi dəyişməyib. Bu isə bizə ümid verir”.

2023-cü ilin noyabrın 20-dən etibarən Azərbaycanda korrupsiya araşdırmaları aparan “Abzas Media” nəşrinin 6 əməkdaşı – direktor Ülvi Həsənli, onun müavini Məhəmməd Kekalov, baş redaktor Sevinc Vaqifqızı, reportyorlar Nərgiz Absalamova və Elnarə Qasımova, araşdırmaçı jurnalist Hafiz Babalı, ötən ilin mayında isə “Azadlıq Radiosu”nun jurnalisti, iqtisadçı Fərid Mehralızadə “Abzas Media işi” çərçivəsində həbs edilib.

Jurnalistlərin hamısı əvvəlcə qaçaqmalçılıqda ittiham olunublar. Ötən ilin avqustunda isə “Abzas Media işi” üzrə həbs edilən şəxslərə qarşı ittihamlar ağırlaşdırılıb. İstintaqın irəli sürdüyü əlavə ittihamları da nəzərə alsaq, jurnalistləri 8 ildən 12 ilədək həbs cəzası gözləyir.

Bu həbslərin siyasi motivli olduğunu bəyan edən yerli və beynəlxalq hüquq müdafiə təşkilatları Azərbaycan hökumətinə çağırış edərək jurnalistlərə qarşı ittihamların ləğv edilməsini, onların azadlığa buraxılmasını tələb ediblər.