Ermənistan Milli Assambleyasının sədri Alen Simonyan bildirib ki, Azərbaycanla, beynəlxalq nümayəndələrlə, səfirlərlə və müxtəlif nümayəndə heyətləri ilə keçirilən, demək olar ki, bütün görüşlərdə Azərbaycanda saxlanılan erməni məhbuslar və itkin düşmüş şəxslərlə bağlı məsələlər müzakirə olunur.

“Armenpress”in məlumatına görə, Simonyan bunu Beynəlxalq İnsan Hüquqları Günü münasibətilə təşkil olunan tədbir çərçivəsində keçirilən brifinqdə deyib.

“Həmişə yadda saxlayın ki, bu iki məsələ problem həll olunana qədər gündəmdə qalacaq və mən müsbət həllə doğru tendensiya görürəm”, – o bildirib və müzakirələrin də bu ümidləri gücləndirdiyini əlavə edib.

Milli Assambleya sədrinin sözlərinə görə, beynəlxalq qurumlar və nümayəndələrlə aparılan söhbətlərə verilən reaksiyalar göstərir ki, Ermənistanın məhbuslar və itkin düşmüş şəxslərlə bağlı tələbləri qanunidir.

“İstisna edirəm ki, istənilən legitim söhbət müsbət nəticə verməsin. Bizə sadəcə bir az daha səbr lazımdır. Digər qardaşlarımız və dostlarımız necə qayıdıblarsa, əminəm ki, orada olan bu insanların hamısı da bir gün Ermənistan Respublikasına qayıdacaqlar”, – Simonyan deyib.

Simonyan həmçinin yaxın vaxtlarda Ermənistan-Azərbaycan sərhədinin daha bir hissəsinin delimitasiya olunacağını düşünür.

“Deməliyəm ki, bəzi məsələlərdə biz tələsirik, bəzi məsələlərdə Azərbaycan tərəfi tələsir, amma proses davam edir və mən düşünürəm ki, yaxın gələcəkdə sərhədin hansısa hissəsini delimitasiya edəcəyik”, – o bildirib, lakin söhbətin konkret hansı sahədən getdiyini açıqlamayıb.

Sədrin ehtimalına görə, proses 2026-cı ilin birinci rübündə baş tuta bilər.

2024-cü ilin iyununda Ermənistan və Azərbaycan delimitasiyanın birinci mərhələsinin başa çatdığını elan edib. Həmin mərhələdə Ermənistanın Tavuş sektoru üzrə 12,6 kilometrlik sərhəd hissəsi delimitasiya olunub.

Məlumata görə, 2025-ci ilin yanvarında Ermənistan və Azərbaycan delimitasiya komissiyaları prosesin şimal hissədən - Ermənistan, Azərbaycan və Gürcüstan sərhədlərinin kəsişmə nöqtəsindən başlayaraq daha sonra cənub istiqamətində, şimaldan cənuba doğru İranla sərhədə qədər davam etdirilməsi barədə razılığa gəliblər.

Ermənistanın baş naziri Nikol Paşinyan da istisna etməyib ki, tərəflər delimitasiya işlərini TRIPP yolunun keçməli olduğu ərazilərdə də aparsınlar. TRIPP layihəsi üzrə razılaşma avqustun 8-də Vaşinqtonda əldə olunub.