Ermənistan Prezidenti Armen Sarkisyan Nikol Paşinyanın ölkənin Baş naziri təyin edilməsi ilə bağlı sərəncam imzalayıb.
Bu haqda məlumatı "Sputnik Ermənistan" yayıb. Paşinyanın bu vəzifəyə namizədliyini “Vətəndaş razılaşması” fraksiyasının rəhbəri Hayk Koncoryan və partiyanın katibi Nazeli Baqdasaryan irəli sürüb.
“Yeni parlament öz səlahiyyətlərini qəbul etdikdən sonra Ermənistan Prezidenti parlamentdə üstünlük qazanmış partiyanın təklif etdiyi namizədi Baş nazir təyin edir. Baş nazir vəzifəsinə Nikol Paşinyanın namizədliyi irəli sürülür”, - deyə Nazeli Baqdasaryan öz feysbuk hesabında məlumat paylaşmışdı.
Ermənistanda növbədənkənar parlament seçkiləri iyunun 20-də baş tutub. Ölkənin Mərkəzi Seçki Komissiyasının məlumatına görə, “Vətəndaş razılaşması” partiyası parlamentdə tam üstünlüyünü təmin edib. Belə ki, parlamentdə bu partiyanı 71 millət vəkili təmsil edir.
