Ramazan bayramının bitməsinin ardından artıq Qurban bayramına da gerisayım başlayıb. Bayrama hazırlıq görən vətəndaşları indi bu günün hansı tarixdə qeyd ediləcəyi maraqlandırır. 

2021-ci ildə Qurban bayramı iyul ayına təsadüf edir. Nazirlər Kabinetinin “2021-ci il üçün Novruz, Ramazan və Qurban bayramları günlərinin müəyyən edilməsi haqqında” Qərarına əsasən, bu il iyulun 20, 21-i Qurban bayramı günləri müəyyən olunub.

Əmək Məcəlləsinin 105-ci maddəsinin 2-ci hissəsinə əsasən, bu Qərarın 1-ci hissəsində nəzərdə tutulan günlər iş günü hesab edilmir.

Müsəlmanların Qurban bayramı 

Müsəlman dünyasında imkanlı adamların qurban kəsməsi Allah-Təala yanında bəyənilmiş - müstəhəb əməllərdən hesab olunur. Dinə görə, Qurban ətindən fəqir və kasıb ailələrə paylamaq lazımdır. Qurban kəsilən heyvan sağlam və kök olmalıdır. Xəstə, arıq və qüsurlu heyvanlar qurbanlığa layiq və məqbul sayılmır. Qurban qoyun, keçi, öküz, inək və dəvə olmalıdır.

Qeyd edək ki, koronavirus pandemiyası səbəbindən bu il xarici ölkələrdən, o cümlədən Azərbaycandan Həcc ziyarəti baş tutmayıb. Ziyarət ancaq Səudiyyə Ərəbistanı daxilində müəyyən qaydalara əməl olunmaqla təşkil edilib.