Nazirlər Kabinetinin qərarına əsasən, bu gündən Azərbaycanda ictimai nəqliyyatın hərəkəti bərpa olunur.
Avtobusların hərəkətinə Novruz bayramı ilə əlaqədar martın 20-si saat 00:00-dan tətbiq olunan qadağanın müddəti bu gün saat 06:00-da başa çatıb. Martın 19-da Nazirlər Kabineti bayram günlərində ictimai nəqliyyatın hərəkətinin tənzimlənməsinə dair qərar qəbul edib.
Qərara əsasən martın 20-i saat 00.00-dan martın 29-u saat 06.00-dək Azərbaycan Respublikasının ərazisində ictimai nəqliyyatın hərəkəti dayandırılmışdı.
19 martdakı qərarla həm də Azərbaycan Respublikasının ərazisində xüsusi karantin rejiminin müddəti uzadılıb: “Koronavirus (COVID-19) infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə Azərbaycan Respublikasının ərazisində xüsusi karantin rejiminin müddəti 2021-ci il 1 iyun saat 06:00-dək uzadılsın”, - qərarda deyilib.
