Bakı Şəhər İcra Hakimiyyətinə (BŞİH) məxsus "Bakı Şəhər Əsaslı Tikinti və Təmir" MMC paytaxt meriyasının digər tabeli strukturları üçün yeni inzibati binanın tikintisinə dair layihə-smeta sənədlərinin hazırlanması üçün kotirovka sorğusu elan edib.

Bu barədə BŞİH açıqlama yayıb. Məlumatda deyilir ki, sorğuda iştirak etmək istəyənlər təkliflərini 1 fevral saat 11:00-a qədər şirkətin yerləşdiyi ünvana təqdim edə bilərlər.

Bundan öncə 2019-ci ildə Bakı Şəhər İcra Hakimiyyətinin inzibati binası da təmirə dayanıb. Təmir-bərpa işlərini həyata keçirən şirkət qarşısında tarixi binanın xarici və daxili görünüşünə xələl gətirilməməsi əsas tələb kimi qoyulub.

Bina Bakı Şəhər Dumasının sifarişi ilə 1900-1904-cü illərdə polyak memar İosif Qoslavskinin layihəsi əsasında barokko üslubunda tikilib. Bu, memarın son əsəri olub. Bina Nazirlər Kabinetinin 2 avqust 2001-ci il tarixli, 132 nömrəli qərarı ilə ölkə əhəmiyyətli memarlıq abidəsi kimi qeydiyyata alınıb.