“Dostlar, Milli Dirçəliş günümüz mübarək olsun! İnanıram ki, bu bayram günündə bəyan etdiyimiz addım milli dirçəliş və milli həmrəyliyə töhfə olacaq”. Bu fikirləri sosial şəbəkədə yazan Milli Strateji Düşüncə Mərkəzinin rəhbəri, Müsavat Partiyasının sabiq başqanı İsa Qəmbər  Elçibəy İnstitutunun yaradıldığını bəyan edib. “Azərbaycan Respublikası Konstitusiyasının Birləşmək Hüququ haqqında 58-ci maddəsini rəhbər tutaraq “Elçibəy İnstitutu” ictimai birliyini yaratdığımızı bəyan edirik.

Məqsəd Azərbaycan Milli Azadlıq və Demokratik hərəkatının lideri, 1992- ci ildə demokratik yolla Azərbaycan prezidenti seçilmiş Əbülfəz Elçibəyin elmi- nəzəri –ideoloji irsini toplamaq, mühafizə və müdafiə, tədqiq, təbliğ və təşviq etməkdir.

Elçibəy İnstitutu Azərbaycan Respublikası qanunvericiliyində yol verilən qayda, forma və vasitələrdən (o cümlədən kitablar, xüsusi buraxılışlar və s. nəşr etmək, elm və digər yaradıcılıq sahələri üzrə müsabiqələr elan etmək, mühazirələr, seminarlar təşkil etmək, kurslar açmaq, dinləmələr və s. tədbirlər keçirmək) istifadə edilməklə fəaliyyət göstərəcək”,-İsa Qəmbər bnildirib. O, təsisçilərin adlarını da açıqlayıb: Arif Hacılı, Arzu Səmədbəyli, Əli Kərimli, İsa Qəmbər, İsmayıl Musa, Qiyas Sadıqov, Oqtay Qasımov, Pənah Hüseyn.