“Paşinyan təzə hakimiyyətə gələndə, Ermənistanın qarışıq vaxtında xeyli məsuliyyətsiz adam burada Əliyevə “vəziyyətdən istifadə et, vur” bağırırdı. İçində səmimi səyləri də var idi, Qarabağ məsələsindən daxili siyasi mübarizə üçün istifadə eşqinə düşmüş biclər də. 

Sanki Azərbaycan ABŞ, Rusiya, Türkiyədir ki, nə vaxt istəsə hərbi əməliyyata başlayar, heç kimi də vecinə almaz”.

Bu sözləri professor Altay Göyüşov özünün facebook hesabında yazıb. Qeyd edib ki, İlham Əliyev o vaxt kütlədən ağıllı və məsuliyyətli olduğunu bütün dünyaya nümayiş etdirdi, vəziyyətdən sui-istifadə etmədi. Elə bu ağlına görə də bütün dünya onu dəstəkləyir:

"Sonra Paşinyan yerini möhkəmlətdi və möhkəmlənəndən sonra həm özü, həm hökumətinin üzvləri həyasız, provokativ çıxışlar, hərəkətlər etməyə başladı.

Mən vaxtilə yazmışdım ki, Minsk Qrupu bu savadsızlığı etibarilə arxayın düşmüş Paşinyanın provokasiyalarını sakitcə nümayiş etməməlidir. Əks təqdirdə bu pis nəticələrə aparıb çıxardacaq.

Çıxartdı da, Əliyev Paşinyanın provokasiyalarına dözməyib, onu sərt şəkildə cəzalandırdı.

Başqa sözlə, bu ölümlərin ilkin səbəbkarı, Qarabağ məsələsini daxili siyasətinə alət etmiş təlxək və tupoy Paşinyandır.

Nəticə isə odur ki, əvvəlki status-kvo yoxdur. Minsk qrupu da artıq yastığı başının altına qoyub yata bilməz. Aktivləşmək məcburiyyətindədir. Türkiyə də artıq bölgədədir. Rusiyanın isə bölgədə mövqeləri əvvəlkindən daha zəifləmiş durumdadır. Heç vaxt Rusiya Əliyevdən indiki kimi münasibət görməyib.

O ki qaldı məsuliyyətsiz populistlərin çığır-bağırtısına, onlara fikir verməyin. Bunu da dəfələrlə yazmışam, Azərbaycan nə ABŞ-dır, nə Rusiya, nə də Türkiyə ki, heç kimi vecinə almadan, bütün dünyanı qabağına alıb hərəkət edə bilsin.

İlham Əliyev Qarabağı o populistlərdən az istəmir, hakimiyyətinin taleyi bundan asılıdır. Fərq odur ki, məsuliyyəti də, beynəlxalq vəziyyət haqqında bilgiləri də populistlərdən qat-qat çoxdur".