ABŞ prezidenti Donald Tramp ölkənin durumu ilə bağlı Konqresin birgə iclası önündə illik hesabat məruzəsi ilə çıxış edib.

Bir saat yarım davam edən nitq zamanı prezident ölkə iqtisadiyyatı, qeyri-qanuni immiqrasiya, təhlükəsizlik, ticarət razılıqları və digər mövzulara toxunub.

Amerikanın Səsi radiosunun məlumatına görə, prezident Tramp Amerikanın 20-ci əsrdə əldə etdiyi nailiyyətləri vurğulayaraq söyləyib ki, “Amerika azadlığı xilas edib, elm sahəsində kökündən dəyişikliklər edib və orta sinfin yaşayış standartını dəyişib”.

O deyib ki, indi artıq ABŞ 21-ci əsr üçün yeni yaşayış standartı müəyyən etməlidir.

“Bütün vətəndaşlarımız üçün gözəl həyat keyfiyyəti əldə etmək bizim üçün əlçatandır”, o əlavə edib.

Donald Tramp son iki ildə administrasiyasının hər iki partiyanın etinasız yanaşdığı məsələlərə sinə gəldiyini söylədi.

[caption id="attachment_73709" align="aligncenter" width="1597"] ABŞ prezidenti Donald Tramp Nümayəndələr Palatasının spikeri Nensi Pelosi ilə salamlaşır[/caption]

O, həmçinin administrasiyasının əldə etdiyi iqtisadi nailiyyətləri vurğulayıb və Birləşmiş Ştatlarda iqtisadi möcüzənin baş verdiyini söyləyib. O bildirib ki, “bunun qarşısını yalnız mənasız müharibələr, siyasət və ya gülünc, qərəzli istintaqlar ala bilər.”

Prezident son zamanlar ən çox müzakirə olunan qeyri-qanuni immiqrasiya məsələsinə də toxunub. O, Konqresin büdcə layihəsini təsdiq etmək üçün önündə 10 günün olduğunu da söyləyib.

“İndi Konqresin Amerikaya qanunsuz mühacirətə son qoymağa, amansız koyotlar, kartellər, narkotik və insan alverçilərinin işini bitirməyə sadiq olduğunu göstərmək vaxtıdır”, Donald Tramp deyib.

Prezident Tramp ölkəyə cənub sərhədindən cinayətkarların daxil olduğunu söyləyib və çıxışa dəvət olunan MS-13 kimi qanqster qrupları tərəfindən öldürülən insanların ailə üzvlərinin adlarını vurğulayaraq, onlar üçün mübarizə aparmağa davam edəcəyini bildirib.

“Ölkəmizin sərhədlərinin təhlükəsizliyi təmin olunmadığına görə amerikalıların həyatını itirməsi kimi bir hala son qoyulacaq”, o deyib.

Donald Tramp iqtisadi nailiyyət əldə etmək üçün əsas prioritetlərdən birinin onillərdir davam edən “fəlakətli ticarət siyasətinə son qoymaq” olduğunu vurğulayıb. O, Çinlə yeni ticarət razılığı ilə bağlı danışıqlar aparıldığını söyləyib. Lakin onun sözlərinə görə, “bu razılığa ədalətsiz ticarət əməllərinə son qoyacaq, xroniki ticarət defisitini azaldacaq və Amerikada iş yerlərini qoruyacaq real struktur dəyişikliyi daxil olmalıdır”.

Prezident gündəmindəki bir digər mühüm məsələnin Amerikanın milli təhlükəsizliyini qorumaq olduğunu söyləyib. O, administrasiyasının heç vaxt Amerikanın maraqlarını təbliğ etdiyinə görə, üzr istəməyəcəyini deyib.

“Məsələn, Birləşmiş Ştatlar onillər öncə Rusiya ilə saziş imzaladı və bu razılığa əsasən nüvə imkanlarını məhdudlaşdırıb, azaldacağına razılaşdı. Biz bu razılığa əməl etsək də, Rusiya dəfələrlə razılığın şərtlərini pozdu. Bu səbəbdən də mən Birləşmiş Ştatların rəsmi olaraq Orta Mənzilli Nüvə Qüvvələri Sazişindən çıxdığını elan etdim”, Tramp deyib.

Donald Tramp həmçinin Birləşmiş Ştatların iki həftə öncə Venesuelada legitim höküməti və yeni müvəqqəti lider olaraq Xuan Quaydonu tanıdığını qeyd edib.

“Biz azadlıq uğrunda ləyaqətli mübarizələrində Venesuela xalqının yanındayıq və Maduro rejiminin amansızlığını qınayırıq. Onun sosialist siyasəti ölkəni Cənubi Amerikanın ən zəngin ölkəsindən ən yoxsul və ümidsiz ökəsinə çevirib”.

ABŞ prezidenti Donald Trampın məruzəsindən bəzi sitatları təqdim edirik:

“Son iki ildə mənim administrasiyam təcililik hissi və tarixi sürətlə hər iki partiyanın liderlərinin bir neçə onillik ərzində sahib çıxmadığı problemlərə sinə gəlir.”

"Biz Amerikada enerji inqilabı etdik – Birləşmiş Ştatlar hal-hazırda dünyada bir nömrəli neft və qaz istehsalçısıdır."

"24 ay sürətli tərəqqidən sonra bütün dünya bizim iqtisadiyyata həsəd aparır, ordumuz planetin ən güclüsüdür və Amerika hər gün qalib gəlməkdədir."

"Biz azadlıq uğrunda ləyaqətli mübarizələrində Venesuela xalqının yanındayıq."

"Bütün amerikalılar fəxr edə bilərlər ki, əmək qüvvəsinə daxil olan qadınların sayı tarixdə heç zaman bu qədər yüksək olmayıb."

"Bu gün mənim irəli sürəcəyim gündəm nə respublikaçıların nə də demokratların gündəmidir. Bu Amerika xalqının gündəmidir."

"Vətəndaşlarımızın həyatlarını və işlərini qoruyacaq immiqrasiya sistemi yaratmaq bizim mənəvi borcumuzdur."

"Biz birlikdə siyasi çıxılmaz vəziyyətə son qoymalıyıq. Biz köhnə ixtilafları aradan qaldırmalı, yaraları sağaltmalı, yeni koalisiyalar yaratmalı, yeni həll yolları irəli sürməli və Amerika gələcəyinin qeyri-adi vədini gerçəkləşdirməliyik."