Bu gün Türkiyə Böyük Millət Məclisinin başqanı postuna seçkilər keçirilib.

Türkiyə parlamentinin başqanı postuna AKP Təkirdağ millət vəkili Mustafa Şentop, CHP İstanbul millət vəkili Engin Altay, Xalqların Demokratik Partiyası (HDP) İzmir millət vəkili Serpil Kemalbay Pekgözegü, İYİ Partiya Qaziantep millət vəkili İmam Hüseyn Filizin namizədliyini irəli sürüb. AKP İstanbul millət vəkili Nevzat Şatıroğlun ehtiyat namizəd kimi irəli sürülsə də, səsvermədən əvvəl namizədliyini geri götürüb.

Milliyətçi Hərəkat Partiyasının sədri Dövlət Bağçalı öncədən AKP-nin namizədi Mustafa Şentopu dəstəkləyəcəklərini bəyan edib.

Qanunvericiliyə əsasən, birinci və ikinci turda parlamentdəki deputatlarının 2/3-nin, yəni 400 deputatın səsini almaq tələb olunur. Üçüncü turda parlamentdəki deputatların mütləq çoxluğunun, yəni 301 deputatın səsini almaq tələb olunur. Üçüncü turda da seçki baş tutmazsa, bu turda ən çox səs alan iki namizəd dördüncü turda yarışmalı, ən çox səs alan namizəd parlamentin sədri seçilməlidir.

Gizli səsvermədə birinci və ikinci turlarda namizədlərin heç biri tələb edilən səsləri toplaya bilməyib. M. Şentop üçüncü turda parlamentin başqanı seçilib.

Qeyd edək ki, 6 avqust 1968-ci ildə Təkirdağda anadan olan M. Şentop 1986-cı ildə Təkirdağ İmam Hatip Liseyini, 1991-ci ildə İstanbul Universitetinin Hüqüq fakültəsini bitirib. Tələbəlik illərindən müxtəlif mətbu orqanlarda yazılar yazan M. Şentop “Təklif Aylıq” hüquq jurnalının qurucuları sırasında yer alıb, 1988-1991-ci illərdə jurnalın baş redaktoru olub. Doktorluq dissertasiyasının Mərmərə Universitetində mülki hüquq üzrə müdafiə edən M. Şentop 2002-ci ildə doktor, 2005-ci ildə dossent, 2011-ci ildə professor olub, müxtəlif universitetlərdə müəllim kimi çalışıb.  Eyni zamanda İqtisadi və Sosial Araşdırmalar Mərkəzinin İstanbul şöbəsinin sədri olub.