Azərbaycan Xalq Cəbhəsi Partiyasının (AXCP) daha iki fəalı saxlanılıb. Bu barədə AXCP sədrinin müavini İlham Hüseyn məlumat yayıb.

Onun sözlərinə görə, siyasi fəal Elnur Cabbarlı fevralın 3-ü axşam saatlarında evlərindən Abşeron Rayon Polis İdarəsinə aparılıb.

Sədr müavinin sözlərinə görə, Amil Məmmədzadəni fevralın 4-ü saat 16 radələrində saxlayıb və Suraxanı Rayon Polis İdarəsinə gətiriblər.

İ.Hüseyn deyir ki, gənclərin saxlanılması siyasi fəallıqları ilə bağlıdır: "Ehtimalım budur ki, onlara da bundan əvvəlki cəbhəçilərə olduğu kimi 20-25 sutka inzibati cəza verilə bilər".

Saxlanılanlarla bağlı adları çəkilən polis idarələrindən şərh almaq mümkün olmayıb.

2019-cu il yanvarın 19-da Milli Şuraya daxil olan siyasi partiyalar və ictimai qurumlar mitinq keçirib. Mitinqə hazırlıq ərəfəsində bir sıra təşkilatçılar həbsə alınıblar.

Daha sonra yanvarın 20-də Şəhidlər Xiyabanını ziyarətdən sonra 20-yə qədər şəxs saxlanılıb.

Bütünlükdə AXCP partiyanın 50 nəfərə kimi fəalının saxlanıldığını, onlardan 20-yə yaxın şəxsin inzibati cəza aldığını, bəzilərinə də pul cərimələri kəsildiyini bildirir.