Keçmiş Rusiya casusu Sergey Skripalın vəziyyəti artıq kritik hesab olunmur və onun sağlıq durumu “sürətlə yaxşılaşır”.

İngiltərədəki Solsberi şəhər xəstəxanasının tibb direktoru Christine Branshard aprelin 6-da deyib ki, Skripal mülaicəyə yaxşı reaksiya verir və durumu kritik deyil.

Keçmiş ikili agent və onun qızı Yulia Skripal martın 4-də Solsberidə kimyəvi maddə ilə zəhərlənmiş və skamya üzərində huşsuz vəziyyətdə tapılmışdılar.

Britaniya Vladimir Putin hökumətini Skripalın zəhərlənməsi üçün Noviçok kimyəvi maddəsindən istifadə etməkdə günahlandırır. Bu kimyəvi maddə 1990-cı illərdə SSRİ-də istehsal olunub.

Rusiya bu ittihamları rədd edir.

Bundan bir gün əvvəl Sergey Skripalın qızı Yulia komadan çıxdıqdan sonra ilk bəyanatını vermiş və səhhətinin günbəgün yaxşılaşdığını bildirmişdi.