Bir qrup naməlum şəxs vəkil, hüquq müdafiəçisi, D18 Hərəkatın idarə heyətin üzvü Samirə Ağayevaya hədə-qorxu gəlib. Hadisə axşam fevralın 24-dü axşam saatlarında S.Ağayevanın evinin yaxınlığında baş verib.

Bu barədə o özü məlumat verib.

İçərisində 2 nəfərin olduğu avtomobil onu avtobus dayanacağından evə qədər izləyib. Blokun qabağında yüksək sürətlə S.Ağayevanın üstünə sürməyə cəhd edib. S.Ağayeva blok tərəfə keçib və maşın arxaya sürüb, o deyir.

“Qaranlıq olduğu üçün maşının nömrəsini görə bilmədim. Yuxarı qalxdım, balkondan baxdım. Maşın 5 dəqiqə gözlədi və getdi”, - S. Ağayeva bildirib.

Hüquq müdafiəçisi baş verənləri onu qorxutmaq cəhdi kimi qiymətləndirib.

O,Amerikanın Səsinin müxbirilə söhbətində bildirib ki, bu, çox güman, onun hüquq-müdafiə və siyasi fəaliyyəti (S.Ağayeva D18 Hərəkatının sədr müavinidir), məhkəmələrdə vətəndaşların hüquqlarını müdafiə etməsilə bağlıdır.

Hüquq müdafiəçisi polisə müraciət edib-etməyəcəyi barədə sualın cavabında deyib ki, avtomobilin nömrəsini görməyib, yaşadığı evin həyətində isə müşahidə kamerası yoxdur.

Hüquq mühafizə qurumları vəkilin açıqlamasını şərh etməyiblər.