Kiyevin mərkəzində yerləşən Oktyabr sarayına girmək istəyən Micheil Saakashvili tərəfdarları ilə hüquq-mühafizə orqanı əməkdaşları arasında toqquşma baş verib.

Kiyev polisinin mətbuat xidmətinin verdiyi məlumata görə, ən azı 32 hüquq-mühafizə orqanının əməkdaşı xəsarət alıb.

Məlumatda deyilir ki, "bilinməyən maddə ilə zəhərlənmiş əməkdaşlar xəstəxanadadır və digər yaralılar barədə məlumatlar dəqiqləşdirilir".

Xəsarət alanlar arasında milli qvardiyanın 15 üzvü və 17 polis var. Baş verənlərlə bağlı 3 cinayət işi açılıb.

Bazar axşamı Gürcüstanın keçmiş prezidenti və Ukraynanın Odessa bölgəsinin köhnə qubernatoru Micheil Saakashvili-nin tərəfdarları Kiyevdə Oktyabr Sarayını ələ keçirməyə çalışıblar. Həmin vaxt binada konsert keçirilib və nəticədə qarşıdurma baş verib.

Bundan əvvəl, Müstəqillik Meydanında keçirilən mitinqdə çıxış edən Saakashvili tərəfdarlarını Oktyabr sarayına getməyə çağırıb. Onun sözlərinə görə, bu sarayda etirazçıların koordinasiya şurası işə başlamalı idi. Həmin vaxt sarayda caz musiqisinin konserti keçirilirdi.

Polisin verdiyi məlumata görə, etirazçılar qarışıqlıq yaradaraq mənşəyi bilinməyən, qıcıqlandırıcı təsirli qazdan istifadə edib, fişənglər və şüşə sular atıb. Bundan əlavə, bəzi hərbi qulluqçuların xüsusi texnikasını ələ keçiriblər.

Saakashvili-nin çağırışından sonra aksiyaçıların əksəriyyəti saraydan ayrılaraq Verkhovna Radaya gedib. Saakashvili özü Ukraynanın bir telekanalına verdiyi müsahibədə yaxın günlərdə Oktyabr sarayında baş vermiş hadisələrə görə etiraz nümayişinə çağırış etməyəcəyini söyləyib.

Ukrayna vətəndaşlığından məhrum edilmiş və Ukraynaya daxil olmasına icazə verilməyən Micheil Saakashvili sentyabr ayında tərəfdarları ilə sərhədi keçərək ölkəyə daxil olub, ona görə cərimə edilib. O, cinayət təşkilatına yardımda ittiham edilib.

Saakashvili dekabrın 8-də ikinci dəfə həbs edilib. O, Ukraynanın Təhlükəsizlik Xidmətinin müvəqqəti saxlama təcridxanasına yerləşdirilib, burada aclıq aksiyası keçirib.

Bir neçə gün sonra Saakashvili Verkhovna Rada millət vəkillərinin zaminliyi nəticəsində azad edilib.