Moskva şəhərinin Basman rayon məhkəməsi azərbaycanlı iş adamı, Çerkizov bazarının keçmiş sahibi Telman İsmayılovun həbsinə dair qərar çıxarıb.

Bu barədə “İnterfax”  Agentliyinə iş adamının vəkili Marina Rusakova məlumat verib. Onun sözlərinə görə, məhkəmə bu qərarı oktyabrın 30-da çıxarıb.

T.İsmayılov sahibkarlar Vladimir Savkin və Yuri Brilev-in qətlində təqsirləndirilir. Hadisə 2016-cı  ilin mayında baş verib. Ticarət komplekslərinin sahibi Vladimir Savkin və “Lublino motors”un təsisçi Yuri Brilev qətlə yetiriliblər.

İsmayılov və onunla əlbir olmaqda təqsirləndirilən Mehman Kərimova “iki və daha artıq şəxsin öldürülməsi” maddəsi ilə ittiham irəli sürülüb.

Vəkil deyir ki, T.İsmayılov ittihamı qəbul etmir.

Qiyabi qəbul edilən həbs qərarı ilə əlaqədar apelyasiya məhkəməsinə müraciət edilib. Apelyasiya şikayətinə noyabrın 15-də  baxılacaq.

T.İsmayılov həm də qanunsuz silah dövriyyəsində təqsirləndirilir.  Azərbaycanlı iş adamı artıq beynəlxalq axtarışa verilib.

Ötən ilin yazında baş verən qətl hadisələri ilə bağlı Telman İsmayılova məxsus 12 ünvanda yoxlamalar həyata keçirilib, onun qardaşı Rafiq İsmayılov həbs edilib.