Xalq artisti Muxtar Maniyev vəfat edib.

Bu barədə APA-ya C. Cabbarlı adına “Azərbaycanfilm” kinostudiyasının direktoru Müşfiq Hətəmov məlumat verib. Xalq artisti şəkərli diabetdən əziyyət çəkirdi. 2015-ci il avqustun 11-də aktyorun sol ayağı, bu ilin martın 15-də isə sağ ayağı Elmi Cərrahiyyə Mərkəzində amputasiya edilib.

Xalq artistinin həyat yoldaşı Nəsibə Maniyeva APA-ya bildirib ki, M. Maniyev dekabrın 22-də, səhərə yaxın dünyasını dəyişib: “Son vaxtlar çox zəifləmişdi. Səhərə yaxın yuxudan qalxdı, narahat olduğunu dedi, ikicə dəqiqə keçmədi, qəfildən gözlərini yumdu. Nəşini Tərə Pir məscidinə aparıblar. Dəfnin harada olacağını hələ bilmirik. Yəqin ki, bir saata vida mərasiminin yeri də, dəfn yeri də dəqiqləşər”.

Mərhum xalq artisti Muxtar Maniyev 1935-ci ildə Bakıda doğulub. Aktyorun ilk filmi "Onu bağışlamaq olarmı?" olub, Sonrakı illərdə "Nəsimi", "İnsan məskən salır", "O qızı tapın", "Bizim Cəbiş müəllim" filmlərinə çəkilib, ümumilikdə isə 150-dən çox filmdə oynayıb.