İşğal altındakı Kəlbəcər rayonunda erməni silahlıları tərəfindən öldürülən Həsən Həsənovun ailəsinə verilən ev Qaçqın və Məcburi Köçkünlərin İşləri üzrə Dövlət Komitəsi tərəfindən geri alınıb.

"Abzas" xəbər verir ki, bu barədə Modern.az-a Həsən Həsənovun qardaşı Nail Həsənov məlumat verib. O deyib ki, Həsənin ailəsinə ev “Dövlətqaçqınkom”un sədri Əli Həsənov tərəfindən verilmişdi:

“Evi Həsənin ailəsinə Müşviqabad qəsəbəsində salınmış yeni şəhərcikdən vermişdilər. Dilqəm və Şahbazın ailəsi ilə bir qonşuluqda. Hətta evin orderinə kimi təqdim etmişdilər. Biz cənab Əli Həsənovun dəfələrlə mətbuatda həmin ailələrin öz istəklərinə uyğun yerdən evlə təmin olunacaqları barədə sözlərini əsas tutaraq, həmin mənzilin Mehdiabaddakı şəhərciyə dəyişdirilməsini xahiş etdik. Çünki Həsənin 2 qızı və yoldaşı orada tək yaşaya bilməzdi. Mehdiabadda yaxınlarımız, qohumlarımız var. Təəssüf ki, “Dövlətqaçqınkom” Həsənin ailəsini nəinki evlə təmin etdi, hətta onun ailəsinə Müşviqabad qəsəbəsindən verilmiş mənzilin başqasına verildiyini söylədilər”.

Komitədən mənzilin boş qalmasını əsas gətirərək, başqa birinə verildiyi açıqlanıb: “Biz dəfələrlə müraciət etsək də, heç olmasa Müşviqabad qəsəbəsindəki evi götürmək istədiyimizi söyləsək də, heç nə alınmır. Sadəcə olaraq bizə deyilir ki, gözləyin. Nəyi gözləyək, kimi gözləyək bilmirik.

“Dövlətqaçqınkom”dan deyirlər ki, “biz gördük ki, ev 4-5 aydır boş qalıb, köçən yoxdu, onu başqasına verdik”. Cənab Əli Həsənov dəfələrlə mətbuatdakı çıxışlarında deyib ki, həmin şəxslərin ailələrinin öz istəklərinə uyğun yerdən evlə təmin olunmasını prezident tapşırıb. Bəs niyə həmin ailələr öz istəklərinə uyğun yerdən mənzillə təmin olunmadılar?”.

Qaçqınların və Məcburi Köçkünlərin işləri üzrə Dövlət Komitəsi erməni girovluğunda  öldürülən Həsən Həsənovun ailəsinə verilən evin geri alındığını təsdiqləyib. Qurumun mətbuat xidmətinin rəhbəri Elçin Qədimov Modern.az-a açıqlamasında deyib ki, ailəyə dövlət tərəfindən tam təmirli ev verilmişdi:

“Həsən Həsənovun ailəsi Müşfiqabad qəsəbəsində yerləşən həmin mənzildən qəti şəkildə imtina etdi. Onlar Mehdiabad ərazisində ev istəyirdi, bizim isə orada boş mənzilimiz yoxdur. Ümumiyyətlə hazırda Bakı şəhərində mənzil tikintisi aparılmır”.

Komitə rəsmisi həmin mənzilin başqa bir məcburi köçkün ailəsinə verilməsinə belə aydınlıq gətirib:

“Hazırda boş mənzil yoxdur. Əməkdaşlarımız neçə ay rəhmətlik Həsənin ailəsinin o evə köçəcəyini gözlədi, amma onlardan səs çıxmadı. Ona görə də mənzil  ehtiyacı olan ailəyə verildi”.

Qeyd edək ki, 2014-cü il iyul ayında soydaşlarımız Dilqəm Əsgərov və Şahbaz Quliyev Kəlbəcərdə öz ata-baba yurdlarını ziyarət etmək istəyərkən Ermənistan Silahlı Qüvvələri tərəfindən girov götürülüblər, onlarla birlikdə olan Cəbrayıl sakini Həsən Həsənov isə güllələnərək öldürülüb. H. Həsənovun meyiti düşməndən alınaraq Bakıda dəfn edilib.

İşğal altındakı Dağlıq Qarabağda D.Əsgərov və Ş.Quliyev üzərində "məhkəmə" qurulub. "Məhkəmə"nin qərarı ilə D.Əsgərov ömürlük, Ş. Quliyev isə 22 il müddətinə azadlıqdan məhrum edilib