"Cəmil Məmmədov II qrup müharibə əlilidir, bunu hamı bilir".

Bu sözləri özünü yandıran Cəmil Məmmədovun dostu, həm də onunla bir məhəllədə yaşayan Anar Ağakişiyev söyləyib.

Dostunun sözlərinə görə, Cəmil Məmmədov hərbi xidmətdən evə buraxılmağına az qalmış kəşfiyyata gedib və minaya düşərək ayağını itirib: "Yəni, demək istəyirəm ki, bu, danılmaz faktdır. Həm də sürdüyü "Naz-Lifan" avtomobili də ona məhz əlilliyinə görə verilib".

Dostu bildirib ki, Cəmil Məmmədovun maşını radara düşüb: "Cəmil də bu adamlara xəbərdarlıq edib ki, maşınımı verin aparım, yoxsa özümə xəsarət yetirəcəyəm. Görünür, polislər onun sözünü ciddiyə almayıblar. O, da benzin tökərək özünü yandırıb. İndi ailəsi, qohum-əqrəbası Cəmilin özünü yandırdığı yerdədirlər".

DİN Cəmil Məmmədov barədə açıqlama verib

Daxili İşlər Nazirliyi mətbuat xidmətinin rəis müavini Ehsan Zahidov özünü yandıran Cəmil Məmmədovun Qarabağ əlili olmadığını deyib. O, hadisə ilə bağlı bu sözləri bildirib:

"Cəmil Məmmədov 1994-cü il təvəllüdlüdür. Perekəşkül qəsəbəsinin sakinidir. Həmin şəxs idarə etdiyi "NazLifan" markalı maşınla rəsmən avtoxuliqanlıqla məşğuldur. Bu günə qədər avtomobili bütün qanunları pozaraq idarə edib. Cəmil Məmmədovun hazırda qanun pozuntularına görə tərtib olunmuş protokollar üzrə 43 min manat cəriməsi var. Onun barəsində 463 elektron protokol tərtib olunub. İdarə etdiyi avtomobildə isə görüntüləri məhdudlaşdırıb".

DİN rəsmisi qeyd edib ki, C.Məmmədovu yol polisi oktyabrın 4-də saxlayıb və avtomobili duracağa aparılıb: "Hadisəni isə iki gün sonra törədib".

Xatırladaq ki, oktyabrın 6-da polis idarəsinin qarşısında özünü yandıran Sumqayıt sakini II qrup əlil Cəmil Məmmədov hələ də reanimasiya şöbəsindədir.