Bakıda Avropa İttifaqının (Aİ) Azərbaycandakı nümayəndəliyi və Aİ-yə üzv ölkələrin səfirlikləri iştrakı ilə “Avropa Şəhərciyi 2016” festivalı keçirilib.

Tədbiri Aİ-nin Azərbaycandakı səfiri Malena Mard açıb və bildirib ki, bu il Aİ Azərbaycanla tərəfdaşlığın 25 illiyini qeyd edir. Bu tərəfdaşlıq hər şeydən əvvəl insanlar arasında əlaqələrə və ünsiyyətə əsaslanır.

Onun sözlərinə görə, 2013-cü ildən etibarən Azərbaycanda bu tədbir keçirilir: “Bu il festivalın miqyası daha böyükdür. Festivalın keçirilməsində məqsəd Avropa İttifaqına üzv ölkələrə öz mədəniyyət və ənənələrini nümayiş etdirmək üçün imkan yaratmaqdır. Bir gün davam edəcək bu festivala heç kəs laqeyd qala bilməyəcək”.

Festival çərçivəsində çoxsaylı müsabiqə və viktorinalar, Avropa ölkələrinə virtual səyahət, milli rəqs və karaoke ifaları, feys-art, şahmat yarışı və s. təşkil olunub. Müsabiqə və viktorinaların qaliblərini isə xüsusi hədiyyələr təqdim edilib. Festivala gələn qonaqlar “qaspaço” və “paella” kimi tanınmış Avropa yeməklərinin hazırlanması üzrə kulinariya şousuna tamaşa ediblər.