Noyabrdan etibarən Azərbaycanda fəaliyyət göstərən müstəqil jurnalistlər kütləvi şəkildə həbs olunurlar

"Dekabrın əvvəlində elan edilmiş əvvəlki siyahı ilə müqayisədə siyasi məhbusların sayı 43 nəfər artaraq 288 nəfər olub". Azərbaycan Siyasi Məhbusların Azadlığı Uğrunda İttifaq siyasi məhbusların yeni siyahısını açıqlayıb.

"Turan"ın dərc etdiyi hesabatda qeyd olunur ki, "Jurnalistlər və blogerlər" qrupuna 9 yeni ad daxil olub və bu kateqoriyadan olan siyasi məhbusların sayı 20 nəfərə çatıb.

Vətəndaş cəmiyyətinin bütün sferaları üzrə siyasi məhbus sayında artım müşahidə olunur.

Jurnalistlər və blogerlər	20 nəfər
Hüquq müdafiəçiləri	2 nəfər
Müxalif partiya və hərəkat üzvləri	22 nəfər
Almaniyadan deport olunan mühacirlər	5 nəfər
Dindarlar	208 nəfər
"Tərtər işi" üzrə məhkumlar	7 nəfər
"Gəncə işi" üzrə həbs olunanlar	13 nəfər
Ömürlük azadlıqdan məhrum edilənlər	11 nəfər

 

Eyni zamanda, "Gəncə işi" üzrə 9 müttəhimin cəza müddəti başa çatdığına görə siyahıdan çıxarılıb.

Siyasi məhbus siyahısına yeni əlavə edilən şəxslər aşağıdakılardır

Hafiz Babalı	Turan Agentliyi və Abzas Media
Elnarə Qasımova	Abzas Media
Ələsgər Məmmədli	Toplum Tv
Müşviq Cabbarov	Toplum tV
Şamo Eminov	"Kanal 13" internet televiziyası
Teymur Kərimov	"Kanal 11" YouTube kanalı
İbrahim Hümbətov	Azerinfo.az saytı

 

Akif Qurbanov	III Respublika Platforması
Ruslan İzzətli	III Respublika Platforması
İlkin Əmrahov	Demokratik Təşəbbüslər İnstitutu
Ramil Babayev	Demokratik Təşəbbüslər İnstitutu
Əli Zeynalov	Demokratik Təşəbbüslər İnstitutu
İlhamiz Quliyev	İctimai fəal
Tofiq Yaqublu	Müsavat Partiyası və Milli Şura
Möhyəddin Orucov	İctimai fəal
Elnur Həsənov	Azərbaycan Xalq Cəbhəsi Partiyası

 

Yerli və beynəlxalq hüquq müdafiəçiləri Azərbaycanda kəskin şəkildə artan siyasi həbslərdən narahatlıq ifadə edirlər və hökuməti qondarma ittihamlarla həbs edilmiş ictimaiyyət nümayəndələrini azad etməyə çağırırlar.

Hökumət tərəfi isə bir qayda olaraq ölkədə siyasi məhbusların olmadığını deyir.

Fevralın 28-də ölkə başçısı İlham Əliyev Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyətini qəbul edib. O, görüşdə bildirib ki, Azərbaycanda əsassız həbslərin olması ilə bağlı deyilənlər yalandır:

“Almaniya mətbuatında Azərbaycan guya azadlıqların təmin olunmadığı, insanların öz fikirlərinə görə həbs olunduğu, diktaturanın hökm sürdüyü despotik bir ölkə kimi təqdim edilir. Bu, tamamilə yalandır və mən bundan təəssüf hissi keçirirəm”, – deyə o bildirib.