İşgəncələr Əleyhinə Araşdırmalar Mərkəzi: "Ölkədə insan hüquqları ilə bağlı vəziyyət pisləşib"

İşgəncələr Əleyhinə Araşdırmalar Mərkəzi: "Ölkədə insan hüquqları ilə bağlı vəziyyət pisləşib"
1 Avqust 2022

"İşgəncələr Əleyhinə Araşdırmalar Mərkəzi" iyul ayında Azərbaycanda insan hüquqlarının vəziyyəti ilə bağlı hesabatını yayımlayıb. 

Hesabatda ölkədə insan hüquqları ilə bağlı vəziyyətin pisləşdiyi, ictimai fəal, jurnalist, vəkil, müxalifət nümayəndələri və digərlərinə qarşı təzyiqlərin artdığı qeyd olunur: 

"İctimai fəallar yaşadıqları ünvanlardan polis bölmələrinə aparılaraq barələrində İnzibati Xətalar Məcəlləsinin müvafiq maddələri ilə saxta inzibati protokollar tərtib edilir, məhkəmələr vasitəsilə inzibati qaydada həbs edilirlər. Hüquq müdafiəçilərinin, jurnalistlərin peşə fəaliyyətlərinə maneələr yaradılır və bəzən də fəaliyyətlərinə imkan verilmir. İctimai fəal Bəxtiyar Hacıyevə və jurnalist Aytən Məmmədovaya qarşı törədilmiş cinayət hadisələrinin üstü hələ də açılmayıb". 

Jurnalist və ictimai fəallar Baş Prokurorluğa çağırılır 

Sənəddə deyilir ki, Baş Prokurorluq yeni Media Haqqında qanunu əsas gətirərək bir qrup jurnalist, ictimai fəallardan onlayn mediada və sosial şəbəkələrdə yazdıqları yazıları dayandırmağı tələb edib.   

Həmçinin, "Kanal 13" internet televiziyasının Bakı bürosunun rəhbəri Əziz Orucov ailəsi ilə birlikdə Sahil bağında gəzərkən naməlum şəxs tərəfindən təhdid edilib. "Xural" internet kanalının rəhbəri Əvəz Zeynallı isə xüsusi ittiham qaydasında məhkəməyə verilib və iş ekspertiza mərhələsindədir. 

Vəkillərə qarşı qanunsuzluqlar da olub

Hesabatda vəkillərin hüquqlarının pozulmasına dair monitorinq də yer alıb. Sənəddə bildirilir ki, 14 iyulda vəkil Gülnar Həsənova Qaradağ rayon Polis İdarəsinin 10-cu polis bölməsində zorakılığa məruz qalıb.

"Bölmə rəisi Nizami Novruzovun göstərişi ilə vəkilin telefonu əlindən alınıb və polis bölməsində saxlanılan müdafiə etdiyi şəxslə görüşünə icazə verilməyib. 

28 iyulda vəkil Əziz Qəmbərliyə Bərdə rayon Polis İdarəsində saxlanılan, müdafiə etdiyi şəxs Hüseynov Hüseyn Ələmşah oğlu ilə 4 gün görüşməsinə qanunsuz olaraq icazə verilməyib. Vəkil bununla bağlı Ombudsmana və digər aidiyyəti orqanlara müraciət etsə də, heç bir müsbət nəticəsi olmayıb".  

İşgəncə halları ilə bağlı məlumat verilmir

Hesabatda deyilir ki, vəkillər Cavad Cavadov, Elçın Sadıqov, Bəxtiyar Hacıyev, Ramil Rüstəmova da kobudluq edildiyi, onların konstitusiyanın 61-ci və Avropa İnsan Hüquqları Konvensiyasının 6-cı maddələrindən doğan hüquqlarının icrasına imkan verilmədiyi bildirilib. 

Sənəddə bildirilir ki, Ədliyyə və Daxili İşlər Nazirliklərinin tabeliyində olan müəssisələrdə saxlanılan, cəza çəkən şəxslərə verilən işgəncə halları gizlədilir. 

"İşgəncələr Əleyhinə Araşdırmalar Mərkəzi bundan sonra da resursları daxilində baş vermiş qanun pozuntularını cəmiyyətə çatdıracaq. Mərkəzin institusional dəstəyə ehtiyacı vardır" - deyə hesabatın sonunda qeyd olunub.

Bənzər Xəbərlər

Yeniliklərdən xəbərdar olmaq üçün abunə olun