Əməliyyata götürülməyən vətəndaş: "İki günə qanıma infeksiya keçsə, ölə bilərəm”

Əməliyyata götürülməyən vətəndaş: "İki günə qanıma infeksiya keçsə, ölə bilərəm”
2 Noyabr 2022
Mətni dəyiş

Əməliyyata ehtiyacının olduğunu deyən vətəndaş tibb müəssisələrində süründürməçiliklə üzləşdiyini deyir

Quba rayon sakini Elşən Müslümov 2018-ci ildə Qusar Rayon Mərkəzi Xəstəxanasında əməliyyat olunandan sonra ayağında infeksiya yaranıb.

Onun sözlərinə görə, əməliyyat olunmalı olsa da, 4 ildir bu məsələyə baxan yoxdur.

“Əməliyyat olunmuşam, diz oynağımı götürüblər. Onun əvəzinə isə oynağıma dəmirlər qoyublar. Dəmirlər 3 aydan bir infeksiya verir və onları dəyişdirirəm. İnfeksiyaya görə mən yenidən əməliyyat olunmalıyam, ancaq süründürməçiliyə salırlar. Dəfələrlə Qusar Rayon Mərkəzi Xəstəxanasına getmişəm, ancaq orada da problemin tam həll olunması üçün heç nə etməyiblər” – deyə Elşən Müslümov bildirib.

Şikayətçi deyir ki, kömək istəmək üçün Quba rayon İcra Hakimiyyətinin başçısı Ziyəddin Əliyevin də qəbulunda olub.

Onun sözlərinə görə, icra başçısı kömək edəcəyini bildirsə də, heç bir yardım göstərməyib:

“Ziyəddin Əliyev baş həkimlə danışırmış kimi telefonla kiminləsə danışdı, mənə dedi get Diaqnostikaya, kömək edəcəklər. Ora getdim, ancaq oradan dedilər ki, bizimlə heç kim danışmayıb, səni tanımırıq. Kor-peşman 3 gün gedib-gəldim, baxan olmadı. Daha sonra, bu günlərdə Milli Məclisin önündə etiraz etdim və məni Travmatalogiya İnsitutuna göndərdirlər. İnstitutda dizimə biz qoyub, göndərdilər rayonumuza. Belə süründürməçiliyə salırlar. Guya icra başçısı, baş həkim bilmir mən nə vəziyyətdəyəm? 2 günə qanıma infeksiya keçsə, bax elə bu gün də ölə bilərəm” – deyə Elşən Müslümov bildirib.

Məsələ ilə bağlı İcbari Tibbi Sığorta üzrə Dövlət Agentliyindən bildirildi ki, Elşən Müslümovla əlaqə saxlanılıb və noyabrın 3-ü Quba Rayon Xəstəxanasında qəbul ediləcək. Əgər müəyyən edilsə ki, o əməliyyat olunmalıdır və onun tibbi ehtiyacı icbari tibbi sığorta xidmətləri zərfinə daxildir, o, dövlət hesabına əməliyyat olunacaq.

Bənzər Xəbərlər

Yeniliklərdən xəbərdar olmaq üçün abunə olun